في يوم من الأيام وبالتحديد يوم السبت بعد إمتحان
الASP
واقفة مع العيال بتوعي وبنرغي
قمت سألتهم سؤال وطلعوا هم كمان عندهم نفس الملحوظة والسؤال
ووعدتهم إني هحطلهم بوست ع البلوج بتاعي نرغي فيه ف الموضوع دا
لربما حد يقدر يساعدنا بمعلومة كدا ولا كدا
ولا سبب كدا ولا كدا
أولاً : أحب أهنئ الشعب البلوجاتي بالعامين الهجري والميلادي الجداد
وأتمنى إنهم يكونوا حلوين وقطاقيط كدا إن شاء الله
ونتخرج فيهم على خير :)
عقبال عيالكم :))
وأتمنى إنهم يكونوا حلوين وقطاقيط كدا إن شاء الله
ونتخرج فيهم على خير :)
عقبال عيالكم :))
المهم
بعد صراااااااااع طويييييل مع النفس ف إني ألاقي كلمة تعبر عن اللي جوايا
مع الإحتفاظ على طبقة الإحترام الهشة للي برغي في سيرتهم
ملقتش أحسن من مقولة معلمة الأجيال الفاضلة اللي بتقول
" عيب عليك دي أقل كلمة أقولها ليك !! "
بجد بجد بجد يعني
ببئى نفسي أبعبع وأقول وأنطق وأهزق وأزعق
وكل المصطلحات الممكنة اللي بتعبر عن إنك مخنوق ومصدوم وأرفان وكل حاجه
لما تلاقي ....
راااااااجل كبييييير ف السن ومحترم وملو هدومه زي ما بيقولوا
وتلاقيه غاوي يعاكس البنات الصغيرين اللي ف سن عياله
أو يهزر هزار غبي وملهوش لازمة
أو يستظرف !!!
لاااااااااااا والخييييييبة إنه مفكر نفسه ظريف ودمه خفيف!!!
يعني بجد بجد بجد
ليه الرااااااااجل المصري لما بيكبر في السن بيكون قليل الأدب ؟؟؟
سؤال مش لاقياله أجابة
يعني إيه أصلاً قليل الأدب ؟؟
يعني ...
أولاً : عمري ما لقيت زوجة محترمة ومربية أجيال فاضلة بتشكر في جوزها بعد ما السنين عدوا عليهم ... بيتوصى بيها بالأبتسامات دائماً والأسلوب اللبق في التعامل ...
ثانياً : تلاقي ا لراجل أد أبويا ولا أكبر وبيستظرف وبيستلطف نفسه وبيهزر ويعاكس
ياعم الكتكوت أنت ... طيب أنا في حضرتي إيه يتهزر عشانه ولا تعاكس عشانه!!!
على رأي اللي بيقولوها خيمة ماشية
ولا هي عدوى وماشيه في الجو؟؟؟
زي اللي يشم نشادر تلاقيه يعطس على طول !!!!
ما تحترم ذاتك يا زميل
السؤال التاني اللي بيصول ويجول في دماغي
لما الشباب المحترم بتاعنا دا يكبر ويكون في سن عمو الكتكوت
ياترى هم كمان هيتحولوا لكتاكيت ظريفة ولطيفة ؟؟؟
شئ مرعب لو حصلتلهم عملية تحول هم كمان:((
بجد وبأمانه
من أولاً وثانياً دول فقط
أنا كرهت جنس الكتاكيت دول كلهم
قبل عملية التحول وبالطبع وقطعاً وابسليوتلي
بعد عملية التحول لتكاكيت ظريفة !!!
وربنا ما يوقعنا في كتكوت ظريف أبداً
وحسبي الله ونعم الوكيل فيكم :((
Posts
13 comments:
عااااااااااتى جدااااا
هما الرجاله كده لما بيكبروا بيتهطلوا
:D
عندك حق والله يا منى
بس مش معنى كدة ان كل الرجالة كدة
بس تقدرى تقولى ان دى حالة نفسية تنتاب البعض منهم
مراهقة متأخرة بعيد عنك :))
ياترى يا منى بتتكلمي عن ميييين ؟؟
:p
هي دي تقريبا والله أعلم مراهقة متأخرة
:D
احلى حاجة انك تطنشيه ومتحاوليش تردي عليه
بس برضه مش هيبطل :D
معلش بقى قدرك كده يا جودة
:P
بس متخافيش هما مش كلهم بيتحولوا لكتاكيت
في منهم بيفضلو ديوك :)
mona..no Comment :|...
//انا بقيت اخاف من كل الناس...
براحة شوية على اعصابك ولا اى حاجة مستهالة الحكاية كلها انه ممكن يكون مبلبع اى حاجة ومش عارف يفرق بين الالف وكوز الدرة وماشى فى ملكوت تانى لوحده وبعدين ليس على المريض حرج يلا ربنا يشفى:D
موووووي هانم
منورة بلوجك ياحن....
:))
هم فعلا بيتهطلوا جداا
-------------------
سنيوريتا
تنتاب البعض ؟؟
ياخوفي من البعض دول يا سوسو :(
فعلا شكلها مراهقة متأخرة
بس يا خيبة الراجل وهو مراهق
فضيحة يا أوختشي بعيد عنك
نورتيني سوسو
----------------
هنووودة
ايه النور دا كللللله
لالا متفهمنيش صح أمال
:))
أنا مقصدش اللي ف دماغك بالمرحلة الأولي
لكن البوست دا بسبب شخصية انتوا متعرفوهاش
بس اللي ف دماغك ينتمي اللي هذه الفئة بشكل ما أو بآخر
:$
نورتيني يا جميل
صحيح يا هند
نسيت أقولك
ربنا يكتر من الديوك
اصل الكتاكيت دول
وحشين أوي
!!!
----------------
برنسيستيييي
يا بسمتي تخافي مين بس وانتي معايا
دانا اجدع راجل يا شيخة
قوليلي بس مين اللي بيخوفك وسيبيهولي
يا أمي في هذا الزمن الجميل
لابد أن تكوني شرسة ومستعدة دائماً للحرب تحت غطاء من الهدوء والبسبوسة
انتي فاهمة انا اقصد ايه بالبسبوسة ؟؟
عامة هي كلمة انا عايزة اكتبها بس مش فاكرة ايه هي
ممكن تتفهم بالبسبوسة
:))
الي المجهول
لا اعتقد أبدا انهم بيكونوا مبلبعين حاجة !!!
لانهم في ثانية بيفوقوا ويتعدلوا وقت ما يحبوا
بس عامة هو عندك حق
إنه ليس على المريض حرج
ودول مرضى
يلا ربنا يشفيهم
البلوج منور برد حضرتك
منى يا حبيبتي كل إللي أقدر أعلق عليه وأقوله :
إن لم تستذئب أكلتك الذئاب""
Esraa shaheen
منى يا حبيبتي كل إللي أقدر أعلق عليه وأقوله :
إن لم تستذئب أكلتك الذئاب""
Esraa shaheen
-------------------
إيسوووووو
هلا وغلا
تو ما أنورت واسفرت وأحمرت وأخضرت
:))
تعرفي يابت بيجي منك حكم
يلا مقبولة منك على أد ...
:))
بس فعلا عندك حق يا ياسو
عشان كدا بحاول على أد ما أقدر أكون مستأذبه
مستأذبه !!
يالهوي
بت يا اسراء انتي اتفرجتي على إدوارد ولا ايه ؟؟
حسبي الله ونعم الوكيل في دا فيلم لخبط عقول البنات وخربها
شكلي هتفرج عليه
ابئى هاتيه يابت معاكي في الامتحان الجاي
:)))
انوووووووووووووور البلوج بردك إيسو
كرريها كتير يا حاجة الله يكرمك
:))
Post a Comment